सर्लाहीको चन्द्रनगर गाउँपालिका मा बाल विवाह तथा दाइजो प्रथा उन्मूलन सम्बन्धी वृहत सभा सम्पन्न भएको छ। गाउँपालिका अध्यक्ष राजकुमार महतोको अध्यक्षता तथा उपसभामुख रुबी कुमारी ठाकुर को प्रमुख आतिथ्यतामा आयोजित कार्यक्रममा प्रतिनिधिसभा सदस्य नीतिमा भण्डारी कर्की, जिल्ला समन्वय समिति सर्लाहीका उपप्रमुख जितेन्द्र महतो कुशवाहालगायतको आतिथ्यता रहेको थियो।

सभालाई सम्बोधन गर्दै उपसभामुख रुबी कुमारी ठाकुरले छोरीलाई पनि छोरासरह समान व्यवहार गर्नुपर्ने तथा शिक्षामा जोड दिन सके मात्र बाल विवाह र दाइजो प्रथाको अन्त्य सम्भव हुने बताइन्। उनले समाज परिवर्तनका लागि अभिभावक, शिक्षक, जनप्रतिनिधि र युवाहरूको साझा प्रयास आवश्यक रहेको धारणा राखिन्।

त्यसैगरी कार्यक्रममा सांसद नीतिमा भण्डारी कर्की तथा जिल्ला समन्वय समिति सर्लाहीका उपप्रमुख जितेन्द्र महतो कुशवाहालगायतले पनि सम्बोधन गर्दै बाल विवाह र दाइजो प्रथा समाजका गम्भीर विकृति भएकाले यसको अन्त्यका लागि सामूहिक अभियान आवश्यक रहेको बताएका थिए।

कार्यक्रममा चन्द्रनगर गाउँपालिकाले आर्थिक वर्ष २०७९/०८० देखि हालसम्म उच्च शिक्षा हासिल गरी विवाह गर्ने छोरीहरूलाई सम्मान गर्दै आएको जानकारी गाउँपालिका अध्यक्ष राजकुमार महतोले दिए। उनका अनुसार हालसम्म स्नातक तह पूरा गरी विवाह गरेका ७१ जना छोरीलाई जनही ५० हजार रुपैयाँ तथा कक्षा १२ उत्तीर्ण गरी २० वर्ष पूरा गरेर विवाह गरेका ८८ जनालाई जनही ११ हजार रुपैयाँका दरले विवाह प्रोत्साहन सहयोग उपलब्ध गराइएको छ।

कार्यक्रममा प्रमुख अतिथि उपसभामुख रुबी कुमारी ठाकुरले लाभग्राहीहरूलाई सम्मानपत्रसहित सम्मान गरेकी थिइन्। “बाल विवाह, जिन्दगी तबाह — दाइजो हटाऔं, छोरी बचाऔं” भन्ने नारासहित आयोजित कार्यक्रममा जनप्रतिनिधि, महिला समूह, युवा तथा स्थानीयवासीको उल्लेखनीय सहभागिता रहेको गाउँपालिकाका प्रमुख प्रशासकीय अधिकृत जय किशोर साहले जानकारी दिए।