पोखरीमा डुबेका बालकको बिहानैदेखि खोजी सुरु

सर्लाहीको लालबन्दी नगरपालिका–१२, जियाजोरमा पोखरीमा डुबेर बेपत्ता बालकको आज बिहानैदेखि पुनः खोजी सुरु गरिएको छ ।

जियाजोरका किसानले आफ्नो निजी जग्गामा केही समय अघिदेखि नै खनेर छाडेको खाल्डो (पोखरी) मा डुबेर लालबन्दी नगरपालिका–११, हीरापुर बस्ने देवेन्द्र ठाकुरका छोरा १५ वर्षीय राजु ठाकुर हिजो अपरान्ह ४ बजेदेखि बेपत्ता भएका हुन् । अत्यधिक गर्मी भएपछि ठाकुर साथीहरुसँगै मिलेर लखन्देहीखोला पारी जियाजोरमा रहेको पोखरीमा पौडी खेल्न पुगेका थिए ।

पौडी खेल्दा अन्य तीन÷चार जना किशोर सकुशल बाहिर निस्कन सफल भएका तर राजु भने पानीमा डुबेका स्थानीयको भनाइ छ । इलाका प्रहरी कार्यालय लालबन्दीका प्रमुख एवं प्रहरी निरीक्षक श्याम थापा मगरले राति अबेरसम्म खोजी गर्दा पनि बालकको अवस्था थाहा हुन नसकेपछि आज बिहानदेखि पुनः गोताखोरसहितको टोलीले खोजी सुरु गरेको उज्यालो अभियानसँग बताए ।