अङ्ग्रेजी नयाँ वर्षमा सर्लाहीका पर्यटकीय स्थल भरिभराउ

अङ्ग्रेजी नयाँ वर्ष सन् २०२५ को पहिलो दिन आज सर्लाहीका विभिन्न पर्यटकीय स्थलहरूमा मानिसहरूको घुइँचो लागेको छ। बागमतीस्थित निर्माणाधीन ताल, सर्लाही–रौतहटको सीमामा पर्ने नुनथर, चन्द्रनगर गाउँपालिकाको नाढीमन ताल, पत्थरकोट, सागरनाथ, र कैलाशपुरीजस्ता पर्यटकीय स्थलहरूमा भीडभाड देखिएको हो।

बागमती र नुनथरका माछा पोखरीमा नयाँ वर्ष मनाउन भारतीय पर्यटकहरूको पनि उल्लेख्य उपस्थिति छ। यसलाई ध्यानमा राख्दै जिल्ला प्रहरी कार्यालय मलङ्गवाले विशेष सुरक्षा योजना सञ्चालन गरेको छ। प्रवक्ता प्रहरी नायब उपरीक्षक दिपक श्रेष्ठका अनुसार सादा पोसाकमा नेपाल प्रहरी र सशस्त्र प्रहरी परिचालन गरिएको छ। बिहान ६ बजेदेखि राति १२ बजेसम्म ट्राफिक प्रहरीले विभिन्न स्थानमा चेकजाँच गरिरहेको छ। भारतको बिहारमा मदिरा निषेध भएपछि सीमावर्ती क्षेत्रका भारतीय नागरिक नयाँ वर्ष मनाउन नेपाल आउने गरेका छन्। मलङ्गवा नाकाबाट मात्र ३०० सवारी साधन नेपाल प्रवेश गरेका छन्। बागमतीको निर्माणाधीन पोखरीमा करिब १०,००० मानिसले नयाँ वर्ष मनाएको अनुमान छ। यसले भन्सार राजस्व र व्यापारमा सकारात्मक प्रभाव परेको छ।

पछिल्ला वर्षहरूमा सर्लाहीमा पनि अङ्ग्रेजी नयाँ वर्षलाई नेपाली नयाँ वर्षजस्तै महत्त्वका साथ मनाउने प्रचलन बढेको छ।