सरकारी संयन्त्रबाट इजरायल जान थाले केयरगिभर

काठमाडौँ — इजरायलको दीर्घकालीन स्याहार केन्द्रमा सहायक श्रमिक (केयरगिभर) मा पहिलो चरणमा छानिएका एक हजार जनालाई पठाउन सुरु भएको छ । सोमबार २ पुरुष र ११ महिला गरी १३ जना इजरायल उडेका छन् ।प्यालेस्टिनी समूह हमाससँग इजरायको द्वन्द्व सुरु भएपछि रोकिएको केयरगिभर जानेक्रम फेरि सुरु भएको हो । इजरायलका लागि योग्यता पुगेर छानिएका ३ हजार ४ सय ६१ जनाको सूचीबाट लक्की ड्रका आधारमा २ हजार १ सय १२ जना छानिएका थिए । त्यसमध्ये पहिलो चरणमा एक हजार जनालाई पठाउन सुरु गरिएको हो ।सोमबार जानेहरूमा शान्ति कार्की, दीपा रिजाल, वेनिमा प्रसाईं, मनीषा थेबे, कुमार राई, प्रेमबहादुर मगर, सपना अधिकारी, सिर्जना खड्का, प्रर्लिना ओली रावत, निशा भुजेल, अनु बरुवल, प्रतीक्षा घिमिरे र सिर्जना सापकोटा छन् । बाँकेकी सपना अधिकारीले इजरायल जाने प्रक्रिया सुरु गरेको सात महिनापछि उड्न पाएको बताइन् । ‘हामीले साउनदेखि नै प्रक्रिया अगाडि बढाएका थियौं । यो हाम्रा लागि सुनौलो मौका हो,’ अधिकारीले भनिन् ।वैदेशिक रोजगार विभागका महानिर्देशक सूर्यबहादुर खत्रीले सरकारी संयन्त्रमार्फत श्रमिक पठाइएको बताए । ‘जीटूजीमार्फत श्रमिक पठाइरहेका छौं । यसलाई आकर्षक गन्तव्यका रूपमा लिइएको छ । यो राम्रो अवसर हो’, पहिलो समूहलाई बिदाइ गर्न त्रिभुवन अन्तर्राष्ट्रिय विमानस्थल पुगेका महानिर्देशक खत्रीले भने, ‘तपाईंहरूले नेपालको इज्जत र प्रतिष्ठाको ख्याल राख्नुहोला । इमानपूर्वक काम गर्नुहोला । तपाईंहरूको कामले अरू दाजुभाइ, दिदीबहिनीले धेरै अवसर प्राप्त गर्नेछन् ।’नेपालका लागि इजरायली राजदूत श्मुलिक आरी बासले इजरायलमा नेपालीले सम्मानजनक व्यवहार पाउने बताए । ‘यो भर्ना प्रक्रियालाई सफल बनाउन इजरायल र नेपालले धेरै मिहिनेत गरेका छन् । साहसी नेपालीलाई इजरायलले स्वागत गर्नेछ,’ उनले भने, ‘निर्धक्कका साथ काम गर्ने वातावरण हुन्छ ।’ उदयपुरका प्रेमबहादुर मगरले सरकारी प्रक्रियामार्फत जाँदा धेरै सहज भएको बताए । ‘अहिले दलालको बिगबिगी छ । सरकारबाट जाँदा कतै पैसा बुझाउनु परेन ।कोही दलाल खोज्नु परेन,’ उनले भने, ‘हामी जस्तो निम्न वर्गका लागि धेरै राम्रो प्रक्रिया हो । बिनालगानी क्षमताअनुसार रोजगारी पायौं ।’ उनले इजरायल जाँदा हवाई टिकटसहित १ लाख ७० हजार खर्च भएको बताए । ‘सबैभन्दा बढी टिकटमा १ लाख ४८ हजार ९ सय रुपैयाँ पर्‍यो । त्यसपछि मेडिकल, ब्रिटिस काउन्सिलको परीक्षा, श्रम स्वीकृति, बिमा, सामाजिक सुरक्षा कोषमा गरी २० हजार रुपैयाँ खर्च भयो,’ उनले भने ।दीर्घकालीन स्याहार केन्द्रमा सबैभन्दा बढी नेपाली १३ सय ४५ जना कार्यरत छन् । उनीहरूले आफूहरू सुरक्षित रहेको बताउँदै आएका छन् । केयरगिभरमा काम गर्ने नेपालीको मासिक तलब ५८ सय ८० इजरायली मुद्रा (करिब दुई लाख २० हजार रुपैयाँ) तोकिएको छ । यसको करार अवधि सुरुमा एक वर्षको हुनेछ । त्यसपछि अधिकतम ५ वर्षसम्म हुनेछ । इजरायलमा करिब १४ हजार दीर्घकालीन स्याहार केन्द्र छन् । गत भदौमा इजरायलले भारतबाट पाँच हजार केयरगिभरसहित १५ हजार श्रमिक लैजाने प्रक्रिया अगाडि बढाएको थियो ।